Lo manifèste
Des de 2015, e era darrèra manifestacion Anem òc, non auem cap agut era escadença de mostrar pes carrèrs era volontat populara d’accès ara lengua occitana. Totun, es talents e eth besonh i son encara.
Des Alps italians enquiara mar grana, amassem-mos. Donem vam, a un movement que sosten era idèa qu’auem besonh de diversitat culturau tant coma de diversitat ecologica o umana. Defenem ua lengua tà toti, que mos permete de créisher amassa en ua societat dubèrta, conscienta deth sòn environament coma dera sua istòria. Coma mès un pòble pòrte colectivament era sua cultura, mès capable serà d’organizar-se, de crear, d’acuélher e de partejar.
Mainatges e maianades, auem toti cantat era sua cançon, es 25 e 26 d’octobre li tornaram era sua casa. Coma entà materializar eth nòste patrimòni immateriau, tornaram a bastir era casa de Joan Petit, en endret a on siguet arrasada en sègle XVII, entà castigar era susmauta des crocants.
Manifestacion, debats, cantades, concèrts, stands des diferenti païsi occitans, passacarrèrs …
Es 25 e 26 d’octobre de 2025, cridam a ua dimenjada hestiva de manifestacion e d’accion pera lengua occitana!
Despuèi 2015 e la darrèira manifestacion Anèm òc, avem pas jamai gut l’ocasion de mostrar per charrèira la volontat populara per l’accès a la linga occitana. Pasmens, l’esveja e le besoenh demoron.
De los Aups italians jusc’a l’ocean Atlantic, massem nos. Eschampem mas un movement que sosten l’idèia qu’avem mestèir de diversitat culturala, tant coma de diversitat ecologica o ben umana. Desfendem mas una linga per trestots, que nos permete de crèisser ensemble dins una societat badada, conscienta de son environament e de son istòria mai. Mai un pueple pòrta collectivament sa cultura, mai sab s’organisar, crear, recebre e partatjar.
Efants, trestots avem chantar sa chançon, le 25 e le 26 d’octòbre 2025, rendem li son ostau. Coma per materialisar nòstre patrimòni immateriau, tornem bastir la maison dau Joan Petit, en l’endreit mèsma que seguèt rasada au siecle XVII, contra la ravolta de los crocants.
Manifestacion, discutidas, chants, concerts, vialatges de los diferents país occitans, cortègi …
La 25 e le 26 d’octòbre 2025, cridem mas per una dimenchada festiva de manifestacion e d’accion per la linga occitana !
Dempuei 2015 e la darriera manifestacion Anèm Òc, aguèrem pas l’enchaison de monstrar dins la ruá la volontat populara d’accès a la lenga occitana. Totparier l’enveja e lo besonh demòran.
Daus Aups italians jusca a l’Atlantica, amassem-nos. Balhem dau lanç a-d’un moviment que sostent l’idéia qu’avem mestier de diversitat culturala, tan coma de diversitat ecologica o umana. Defendam una lenga per tots, que nos fai frotjar ensem dins una societat duberta, conscienta de son environament e de son istòria. Mai un pòble pòrta collectivament sa cultura, mai pòt s’organisar, crear, aculhir e partajar.
Mainatges, avem tots chantat sa chançon, los 25 e 26 d’octobre li tornarem bastir sa maison. Per materialisar nòstre patrimòni imateriau, tornem bastir la maison de Joan Pitit a l’endrech onte fuguet abasida au segle XVII, per chastiment de la revòlta daus crocants.
Manifestacion, discutidas, chantadas, concerts, vilatjons daus país occitans, passa-charrieras…
Los 25 e 26 d’octobre, vos credam a-d’una dimenjada festiva de manifestacions e d’accions per la lenga occitana !
Dempuèi 2015, e la darrièra manifestacion Anem Òc, avèm pas agut l’escasença de mostrar per carrièra la volontat populara d’accès a la lenga occitana. Pr’aquò, l’enveja e la necesitat i son encara.
Dels Alps italians fins a la Mar Granda, recampem-nos. Balhem de vam, a un moviment que sosten l’idèa qu’avèm besonh de diversitat culturala tant coma de diversitat ecologica o umana. Defendèm una lenga per totes, que nos permet de créisser amassa dins una societat dubèrta, conscienta de son environament coma de son istòria. Mai un pòble pòrta collectivament sa cultura, mai es capable de s’organizar, de crear, d’aculhir e de partejar.
Mainatges, avèm totes cantat sa cançon, los 25 e 26 d’octobre li tornarem son ostal. Coma per materializar lo nòstre patrimòni immaterial, tornarem bastir l’ostal del Joan Petit, a l’endrech ont foguèt rasat al sègle XVII, per castigament de la revòlta dels crocants.
Manifestacion, discutidas, cantadas, concèrts, vilatjòts dels diferents païses occitans, passacarrièra…
Los 25 e 26 d’octobre de 2025, cridam a una dimenjada festiva de manifestacion e d’accion per la lenga occitana !
Desempuish 2015, e la darrèra manifestacion Anem òc, n’avem pas avut lo parat d’amuishar per carrèra la volontat populara d’accès a la lenga occitana. Totun l’enveja e la necesitat qu’i demòran.
De las Valadas Occitanas cap a la Mar Grana, amassem-nos ! Balham ua impulsion a un moviment qui sostien l’idèa qu’avem besonh de diversitat culturala com de diversitat ecologica o umana. Defendem ua lenga tà tots, qui nos permet d’evoluar amassa en ua societat ubèrta, conscienta deu son enviroament com de la soa istòria. Mei un pòble e pòrta collectivament la soa cultura, mei sia capable de s’organizar, de crear, d’arcuélher e de partatjar.
Mainats, que cantavam tots la soa cançon. Los 25 e 26 d’octobre, que’u tornarem l’ostau. Com tà materializar lo noste patrimòni immateriau, vam tornar bastir l’ostau deu Joan Petit, a l’endret on estè rasat au sègle XVII per castig de la susmauta deus crocants.
Manifestacion, disutidas, cantèras, concerts, vilatjòts deus différents país occitans, passacarrèra …
Los 25 e 26 d’octobre de 2025, cridam a ua dimenjada hestiva de manifestacion e d’accion tà la lenga occitana !
Despuei 2015, e la darriera manifestacion Anem Òc, avèm pas agut l’escasença de mostrar per carriera la volontat populara d’accès a la lenga occitana. Pasmens, l’enveja e la necesitat li son encara.
Deis Aups italians fins a la Mar Granda, recampem-si. Donem de vam, a un moviment que sostèn l’idèa qu’avèm de besonh de diversitat culturala tant coma de diversitat ecologica o umana. Defendèm una lenga per totei, que nos permete de créisser ensems dins una societat dubèrta, conscienta de son environament coma de son istòria. Mai un pòple pòrta collectivament sa cultura, mai es capable de s’organizar, de crear, d’aculhir e de partejar.
Pichòts, avèm totei cantat sa cançon, lei 25 e 26 d’octòbre li tornarem son ostau. Coma per materializar lo nòstre patrimòni immateriau, tornarem bastir l’ostau dau Joan Petit, a l’endrech que fuguèt rasat au sègle XVII, per castigament de la revòuta dei crocants.
Manifestacion, discutidas, cantadas, concèrts, vilatjòts dei diferents país occitans, passacarrièra…
Lei 25 e 26 d’octòbre de 2025, cridam a una dimenchada festiva de manifestacion e d’accion per la lenga occitana !
Da puèi lo 2015 las sion passaas d’annadas e de la derrièra manifestacion “Anem Òc”. D’aquel moment, bèle si las diferentas realitats d’Occitaniá las an portat arant sas batalhas malurosament las an pas mai agut l’occasion de mostrar per charrièra la volontat populara d’accès a la lenga occitana. Totun, l’enveá e la necesitat las li sion encara e las sion pro vivas.
De las valadas occitanas de las Alps dinc a quèlas dals Pirenèus en passant per lo Massís Central, de la Mediterraneá a la Mar Granda, rechampem-nos. Balhem de vam, a un moviment que sosten l’ideá qu’ós avèm besonh de diversitat culturala tant coma de diversitat ecologica o umana. Defendèm una lenga per tuts, que la nos permet de crèisser ensemb dins una societat ubèrta, conscienta de son environament coma de son istòria. Mai un pòple pòrta collectivament sa cultura, mai el es capable de s’organizar, de crear, d’aculhir e de partejar.
Mainaas, avèm tuts chantat sa chançon, los 25 e 26 d’octobre li tornarem a son ostal. Coma per materializar lo nostre patrimòni immaterial, tornarem bastir l’ostal dal Joan Petit, a l’endreit ont l’es eitat deitrut al sègle XVII, per chastiament de la revòlta dals crocants.
Vielafrancha sarè lo cuer picant d’aicèste revíscol entre manifestacions, devis, chants, concèrts, vilatjòts dals diferents país occitans, passacharrièra…
Depuis 2015 et la dernière manifestation Anèm òc, nous n’avons pas eu l’occasion de montrer dans la rue la volonté populaire pour l’accès à la langue occitane. Cependant, l’envie et la nécessité demeurent.
Des Alpes italiennes jusqu’à l’océan Atlantique, rassemblons nous. Impulsons un mouvement qui soutient l’idée que nous avons besoin de diversité culturelle, tout comme de diversité écologique ou humaine. Défendons une langue pour tous, qui nous permet de grandir ensemble dans une société ouverte, consciente de son environnement comme de son histoire. Plus un peuple porte collectivement sa culture, plus il est capable s’organiser, de créer, d’accueillir e de partager.
Enfants, nous avons tous chanté sa chanson, le 25 et 26 octobre 2025, nous lui rendrons sa maison. Comme pour matérialiser notre patrimoine immatériel, reconstruisons la maison de Jean Petit, à l’endroit même où elle fut rasée au XVIIe siècle, en répression de la révolte des croquants.
Manifestation, discutions, cantèras, concerts, villages des différents pays occitans, cortège …
Le 25 et 26 octobre 2025, nous appelons à un weekend festif de manifestation et d’action pour la langue occitane !